早前，我哋喺FB同IG都分享咗友好客戶@vincenty3d嘅最新3D打印作品：NL-01機械人。Vincent除咗同我哋分享佢嘅創作過程之外，仲講咗作品背後原來有個非常有趣嘅小故事。
作品嘅靈感原來係來自佢仔仔嘅一個諗法：仔仔自認自己係一個「唔聽話」嘅小朋友。點樣「唔聽話」法？原來係唔聽人講嘢。於是，受啟發嘅Vincent就創作咗On/Off系列嘅第一彈：Listen，想提醒大家用心聆聽嘅重要。
 |  |
 |  |
NL-01嘅特點就係佢個開關掣係閂埋嘅，表示佢唔聽人講嘢。望入去駕駛艙，仲可以發現裏面有嚿「米田共」喺度添。雖然呢嚿「米田共」都相當得意，但就表示咗如果唔聽人講嘢，即係汲取唔到任何嘢，咁就會冇得思考，於是駕駛艙入面净係得返啲「廢料」喺度喇。
而願意聽取人哋意見嘅話，就會好似圖中綠色嘅DL機械人咁「快高長大」。
呢個作品真係相當有意思，其實「唔聽話」嘅邊有分小朋友定大人。不過，既然仔仔有咁嘅自覺，相信佢都會好似DL機械人咁不斷成長嘅。唔知我哋啲大人有冇呢份自覺呢？要見到DL機械人嘅「成長」仲需要啲時間，我哋先睇睇NL機械人點樣「誕生」：
 |  |
 |  |
 |  |
用Nomad Sculpt完成作品之後，就可以交俾3D打印機去打印。印完都有好多打印後製嘅工藝要做，唔係好似整模型咁，而真係就係整模型咁：打磨、補土、上色、抛光，樣樣齊！
 |  |
 |  |
 |  |
 |  |
NL-01機械人做到咁型，真係好想印多幾個出嚟！到時成支軍團咁一定好震撼！
希望Vincent嘅仔仔繼續出多啲idea俾老竇去執行，等我哋都有多啲3D打印藝術作品欣賞啦！
想知道故事後續發展？呢度有得睇啦：
Comments