#3dartist @vincenty3d 嘅On/Off系列又有新作啦！為咗實現仔仔Wayne各種天馬行空、古靈精怪嘅諗法，同埋記錄低Wayne嘅成長發展，身爲老竇嘅Vincent表示，作品系列嘅靈感同主題真係可以源源不絕、陸續有嚟（笑）
On/Off系列嚟到第三彈，唔知大家有冇發覺作品嘅角色都係成雙成對咁登場？而且頭上都會有個開關掣：On即係「開」，表示「好」嘅一面；Off即係「關」，表示「壞」嘅一面。透過呢個系列，Vincent希望可以鼓勵大家成爲更好嘅自己，同時亦以「反面教材」作爲自我警惕及提醒。
而On/Off系列嘅第三彈：Kind 就用經典嘅漫畫「大力水手」人物角色：Bluto同Popeye，作爲善惡之分嘅代表，真可謂係經典中嘅經典！
Bluto顯然係一個尖酸刻薄、喜歡欺負人嘅惡霸，所以頭上個開關掣指向Off。唔知個開關掣可唔可以將Bluto苛刻嘅性格都閂埋呢？
Popeye則係心地善良嘅代表人物。之但係，由於Popeye會用暴力解決問題，所以佢個開關掣係可以啪上啪落㗎！真係轉On又得，立即轉Off又得，得咗！
Vincent仲做咗個3D打印完成後嘅上色極速示範，想知多啲點樣上色嘅朋友即刻可以睇睇！有興趣嘅朋友仲可以到Vincent嘅Youtube Channel，發掘更多用Nomad Sculpt創作嘅短片！
其實唔止小朋友，就連大人見到On/Off系列作品個開關掣，都忍唔住手想試下係咪真係可以啪下（笑）宜家Popeye個開關掣終於啪到啦！簡直冇得彈！
希望呢個父子檔、拍住上嘅On/Off系列可以長做長有！唔知下一個作品又會係點嘅呢？等我哋一齊嚟期待下先！而有3D打印機嘅朋友，不妨下載Vincent分享嘅Bluto STL檔案，印埋出嚟、試下上色啦！
Beets網站會員(非會員可在下載時免費加入)限定: Bluto STL檔案下載
想知道成個系列嘅發展？呢度有得睇：
Kommentare